एकजना प्रख्यात बेलायती पर्वतारोहीले सगरमाथा (विश्वको सर्वोच्च शिखर) १९ औँ पटक सफल आरोहण गरी विदेशी आरोहीहरूमध्ये सबैभन्दा धेरैपटक सगरमाथा चढ्ने कीर्तिमान फेरि आफ्नै नाममा कायम गरेका छन्।
बेस क्याम्प अधिकारीहरूका अनुसार दक्षिण पश्चिम इङ्ल्यान्डको ग्लोसेस्टरशायर निवासी केन्टन कूलले सगरमाथा सफल आरोहणको बेलायती कीर्तिमान समेत तोड्दै नयाँ कीर्तिमान बनाएका छन्। अधिकारीहरूका अनुसार केन्टन कूल डोरजी ग्याल्जेन शेर्पासँगै बिहान करिब ९:१५ बजे सगरमाथाको शिखरमा पुगेका थिए। डोरजी ग्याल्जेनले समेत यसपटक आफ्नो २३ औँ पटक सगरमाथा सफल आरोहण गरेका हुन्।
५२ वर्षीय केन्टन कूलले सन् २०१३ मा एकै सिजनमा माउण्ट नुप्ट्से, सगरमाथा र ल्होत्से चढ्ने पहिलो बेलायती पर्वतारोहीको कीर्तिमान राखेका थिए। उनले सन् २०२१ मा सगरमाथा आरोहण गरेको २९ घण्टा भित्रै माउण्ट ल्होत्सेको समेत सफल आरोहण गरेका थिए।
