गुवाहाटी, असम – नेपाली भाषाका ख्यातिप्राप्त उपन्यासकार तथा पद्मश्री सम्मानित साहित्यकार लीलबहादुर क्षेत्रीको बिहीबार राति १०:३० बजे आफ्नै निवास गुवाहाटीमा निधन भएको छ।
क्षेत्रीको निधनलाई भारतीय नेपाली साहित्य जगतले एक युगको अन्त्यको रूपमा व्याख्या गरेको छ।
सन् १९२९ (वि.सं. १९८९) मा भारतको असममा जन्मिएका क्षेत्रीका ‘बसाइँ’ जस्ता चर्चित उपन्यास नेपाली साहित्यमा अमिट छन्। सन् १९८६ मा प्रकाशित ‘ब्रह्मपुत्रको छेउछाउ’ कृतिका लागि उनले प्रतिष्ठित साहित्य अकादमी पुरस्कार प्राप्त गरेका थिए। उनका अन्य कृतिहरूमा ‘अतृप्त’, ‘प्रतिध्वनिहरु विस्मृतिको’, ‘असममा नेपाली भाषाको साह्रोगाह्रो’, र ‘तीन दशक बीस अभिव्यक्ति’ लगायतका आख्यान तथा गैरआख्यान संग्रह समावेश छन्।
समीक्षा, कथा, निबन्ध, र उपन्यास विधामा डेढ दर्जनभन्दा बढी कृतिहरू लेखेका क्षेत्रीले नेपाली भाषा-साहित्यमा पुर्याएको अतुलनीय योगदानका लागि नेपाल सरकारले २०७२ सालमा जगदम्बा पुरस्कार प्रदान गरेको थियो।
उनको परिवारमा श्रीमती, दुई छोरा, र एक छोरी रहेका छन्।
