काठमाडौं । नेपाल प्रहरीले जेनजी आन्दोलनका क्रममा नियन्त्रणमा परेका हातहतियार, सञ्चार साधन, सवारी साधन, पोशाकलगायत सामग्रीहरू फिर्ता गर्न आग्रह गरेको छ।
गृह मन्त्रालय अन्तर्गत नेपाल प्रहरी प्रधान कार्यालयले शुक्रबार सार्वजनिक गरेको विज्ञप्तिमा भदौ २३ देखि २५ गतेसम्मको प्रदर्शनका क्रममा प्रहरीसहित अन्य सुरक्षा निकायका भौतिक सामग्री प्रदर्शनकारी वा अन्य व्यक्तिहरूको कब्जामा गएको हुनसक्ने भन्दै यस्ता सामानहरू नजिकैको प्रहरी कार्यालयमा बुझाउन अनुरोध गरिएको छ।
प्रहरीले आन्दोलनका क्रममा नियन्त्रणमा लिइएका प्रहरीका पोशाकहरूको दुरुपयोग नगर्न पनि चेतावनी दिएको छ। साथै सो सम्बन्धमा जानकारी भएमा तुरुन्त प्रहरीलाई सूचित गर्न सर्वसाधारणलाई आग्रह गरिएको छ।
