१४ चैत, काठमाडौं । एपीएफ क्लब ललितपुर मेयर कप महिला क्रिकेटमा अपराजित रहँदै फाइनल प्रवेश गरेको छ ।
ललितपुर मेयर ११ लाई ३७ रनले पराजित गर्दै एपीएफ फाइनल प्रवेश गरेको हो ।
एपीएफको जितमा राजमती ऐरीको अलराउन्डर प्रदर्शन रह्यो । ब्याटिङतर्फ ४१ रनको अविजित पारी खेलेकी उनले बलिङतर्फ २ विकेट लिइन् ।
एपीएफकी सीता राना मगरले १९ रन जोडिन् ।
ललितपुर मेयर ११ का लागि सिमाना केसी र सृष्टि जैशीले समान २–२ विकेट लिए ।
१११ रनको लक्ष्य पछ्याएको ललितपुर मेयर ११ ले निर्धारित २० ओभरमा ८ विकेट गुमाउँदै ७३ रन मात्रै बनाउन सक्यो ।
ललितपुरका लागि सोनी पाख्रिनले सर्वाधिक १५ रन बनाइन् । उनले १९ बलमा १ चौका प्रहार गरिन् । लक्ष्मी चौधरीले १० रन बनाउँदै बिनु बुढाको बलमा इन्दु बर्माको हातबाट क्याच भइन् ।
सिमाना केसीले १० रन जोडे भने अन्य कसैले पनि दोहोरो अंकमा रन बनाउन सकेनन् । यो जीतसँगै ४ खेलमा ८ अंक जोडेको एपीएफले यसअघि नै फाइनलमा स्थान सुरक्षित गरिसकेको छ ।
