४ असोज, काठमाडौं । गोरखाको सिरानचोक गाउँपालिका-२ थालाजुङस्थित भित्री सडकखण्डमा जिप दुर्घटनामा परेको छ ।
भच्चेकबाट चित्रेपोखरीतर्फ आउँदै गरेको ग १ ज ६३८९ नम्बरको जिप ब्रेक फेल भई आइतबार बिहान साढे १० बजे दुर्घटनामा परेको हो ।
सडकको नालामा खसेर भित्तामा ठोक्किँदा चालकसहित ९ जना सवारमध्ये ८ जना घाइते भएका छन् ।
दुर्घटनामा परी घाइते हुनेमा सिरानचोक गाउँपालिका-२ काँउलेकी ८१ वर्षीया लालमाया गुरुङ, सिरानचोक गाउँपालिका-७ का ६८ वर्षीय कमलबहादुर घिमिरे, सोही ठाउँ बस्ने ४८ वर्षीया सीता पाण्डे, ४८ वर्षीय लोकबहादुर खड्का, ७३ वर्षीय कुलबहादुर सार्की, सिरानचोक गाउँपालिका-६ सिम्लेकी ६८ वर्षीया सीता गुरुङ, सिरानचोक गाउँपालिका-७ डाँडागाउँकी २७ वर्षीया रोजिना नेपाली र उनको २१ महिनाकी छोरी रेविका नेपाली छन् ।
घाइतेहरूलाई उद्धार गरी उपचारका लागि प्रदेश अस्पताल आँपपिपल गोरखा पठाइएको छ ।
प्रहरीका अनुसार चालकलाई नियन्त्रणमा लिई दुर्घटनाबारे थप अनुसन्धान भइरहेको छ ।