बैंकको मुख्य काम पैसो रोपेर पैसो कमाउने हो। बैंक एउटा यस्तो कारखाना हो जसको कच्चा पदार्थ (डिपोजिट) रूपैयाँ हो यसले सेवा बिक्री गर्छ कर्जाको रुपमा त्यो पनि रूपैयाँ हो र यसले आफ्नो अन्तिम मुनाफा आर्जन गर्छ जुन पनि रूपैयाँ नै हो। बैंकको यो ‘मनि साइकल’मा मुनाफा भने डिपोजिट र क्रेडिट बीचको ब्याजदरको फरक नै हुन्छ, सामान्य थोरैमा उठाउँ र धेरैमा लगाउँ।
तर,अहिले बिगत २ बर्ष देखि नेपाली बैंक तथा वित्तिय संस्थाहरुमा एउटा अनौठो समस्या आइपरेको छ बैंकसंगै अहिले रूपैयाँको अभाव छ। सबै जसो बैंकको कर्जा-निक्षेप सिडी रेसियो ८५ देखि ९० प्रतिशत सम्म पुगिसकेको छ। अर्थात बैंकहरुको ढुकुटीमा अब थप ऋण प्रवाह गर्न रूपैयाँ छैन। कोभिडले २०१९मा विश्व आक्रान्त बनाउँदा नेपाल पनि अछुतो रहन सकेन र नेपालको अर्थतन्त्र बिभिन्न बहुआयामिक मारमा पर्दै गयो। यसले अर्थतन्त्र संकुचित हुन् जाँदा अहिलेको जटिल अवस्था सिर्जना भएको हो।