३ असोज, काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले जेन-जी आन्दोलन अघि नै पार्टीमा नेतृत्व हस्तान्तरणको प्रस्ताव राखिसकेको जिकिर गरेका छन् ।
शुक्रबार संविधान दिवसको अवसरमा पार्टी मुख्यालय पेरिसडाँडामा आयोजित कार्यक्रमलाई सम्बोधन गर्दै प्रचण्डले पार्टीको केन्द्रीय समिति र स्थायी समितिको बैठकमा नेतृत्व हस्तान्तरणको प्रस्ताव राखिसकेको बताएका हुन् ।
‘अहिले जेन-जी आन्दोलन भएको कारण मात्रै होइन, गएको केन्द्रीय समिति बैठकमा र केही समय पहिले हाम्रो पार्टीको स्थायी समितिको बैठकमा पनि एउटा निश्चित विधि अपनाएर नेतृत्व हस्तान्तरण गर्ने बारे सोच्नुपर्छ भनेर मैले नै राखेको छु,’ उनले भने ।
प्रचण्डले थपे, ‘एउटा निश्चित प्रक्रिया मार्फत् हाम्रो पार्टीको ऐतिहासिक विरासत र गौरवले बनाएको मानकलाई कमजोर नपार्नेगरी हाम्रो पार्टीको एकता र केन्द्रीकरणलाई कमजोर नपार्ने गरी नेतृत्व हस्तान्तरण बारे छलफल हाम्रो पार्टीमा छ,’ उनले भने ।
नेतृत्व हस्तान्तरणको विधि, प्रक्रिया र समयबारे कम्युनिष्ट क्रान्तिकारीहरूले सोच्नुपर्ने उनले बताए । ‘तपाईंलाई यो सुन्दा अनौठो लाग्न सक्छ, पार्टी अध्यक्षको हैसियतले यो बहस अगाडि बढाउनु पर्छ भनेर मैले स्थायी समितिमा भनिसकेको छु’ उनले भने, ‘यो विषय अब तमाम कम्युनिष्ट क्रान्तिकारीहरू हाम्रा नेता कार्यकर्ता सबैले पनि गहिरोगरी त्यो विधि, त्यो प्रक्रिया र त्यो समयबारे सोच्नुपर्छ ।’
प्रचण्डले नेतृत्व हस्तान्तरण ‘प्रतिक्रियावादी’ हरूलाई फाइदा हुनेगरी गर्न नहुने बताए । ‘गतल तरिकाले आफ्नो इतिहास गौरव र विरासतलाई अपमानित हुने ढंगले प्रतिक्रियावादीहरूले फाइदा उठाउन नसक्नेगरी हामीले त्यो प्रक्रिया अगाडि बढाउनुपर्ने छ ।’
उनले थपे, ‘फेरि पनि एउटा नयाँ इतिहास बनाउन सक्ने तागत र सामर्थ्य भएको पार्टी माओवादी केन्द्र नै हो । जेनजी पुस्ताको बलिदान योगदान बुझ्ने पार्टी माओवादी मात्रै हो । नयाँ ढंगले सोच्न सक्ने पार्टी माओवादी मात्रै हो,’ उनले जिकिर गरे ।
