बर्खा लागेसँगै काठमाडौं उपत्यकामा झाडापखाला र हैजाको संक्रमण देखा परेको छ । काठमाडौं उपत्यकामा हालसम्म १२ जनामा हैजा रोग पुष्टि भएको छ । उपत्यका विभिन्न १० स्थानका मानिसमा हैजा रोग देखिएको ‘इपिडिमियोलोजी तथा रोग नियन्त्रण महाशाखा (इडीसीडी)ले जनाएको छ ।
राजधानीका विभिन्न ठाउँमा हैजाका बिरामी फेला परेका छन्, हैजा संक्रमणको मुख्य स्रोत के हो ?
राजधानीका विभिन्न १० स्थानका १२ जना मानिसमा हैजा पुष्टि भएको छ । हैजा देखिएका मानिसमा कुन स्रोतबाट फैलिएको छ भन्नेमा केन्द्रित रहेर अहिलेसम्म संकलन गरिएका नमुनामा पानीकै कारण संक्रमण भएको रिपोर्ट आएका छन् ।
बागबजारमा हैजा पुष्टि भएकाहरुलाई पनि पानीकै माध्यमबाट सरेको पाइएको छ । त्यहाँको पानीमा इकोलाइ कोलिफर्म पुष्टि भएको छ । यो दिसाको कारणले भएको देखियो । डिल्लीबजारमा पानी प्रदूषित भएका कारण हैजा रोग देखिएको नमुना परीक्षणपछि थाहा भयो ।
यस्तै, सानेपामा हैजा पुष्टि हुनेमा पनि प्रदूषित पानीका कारण भएको नतिजाले देखाएको छ । ललितपुरको सानेपा क्षेत्रमा ८ वटा नमुना परीक्षण गर्दा ६२ प्रतिशतमा इकोलाइ नै पुष्टि भएको छ । पानी प्रदूषित भएका कारण हैजा देखिएको भन्ने कुरा पुष्टि भएको छ ।
इनारको पानी, ट्युबवेलको पानी पनि प्रदूषित देखिएको छ । सिल तोडेको जारको पानी पनि प्रदूषित देखिएको छ । कहीँ सिल नतोडिएका जारका पानी पनि प्रदूषित भेटिएको छ ।
