स्याङ्जाका सूर्यप्रकाश गिरी दुबई बसेको १० वर्षभन्दा बढी भयो । दुबईमा बसेर उनी नेपालीलाई भिजिट भिसामा बोलाउने काम गर्छन् । त्यसका लागि उनले प्रतिव्यक्ति दुई लाखदेखि ५ लाखसम्म रूपैयाँ लिन्छन् ।
उनले त्यसरी ठगी गरेका पीडितको संख्या थुप्रो छ । तनहुँका सूर्यबहादुर अधिकारीले उनलाई डेढ लाख रूपैयाँ बुझाएका थिए । काठमाडौंमा रहेकी तबिता गुरूङको नाममा अधिकारीले पैसा जम्मा गरिदिए । उनीसँगै उनका साथीले दुई लाख रूपैयाँ तबिताको नाममा जम्मा गरेका थिए । तर, उनीहरू दुबई जानु त परै जावस्, आफूले दिएको पैसासमेत फिर्ता पाएका छैनन् । पैसा फिर्ता माग्दा गिरीले उल्टै धम्की दिन्छन् ।
बर्दियाका २६ वर्षीय योगेश परियार दुबईमा बसेर नेपालीलाई ठगी गर्ने गिरोहका नाइके हुन् । उनले पनि नेपाली सेना, नेपाल प्रहरी तथा सशस्त्र प्रहरीका भूतपूर्व, भगौडा तथा पेन्सन खाइरहेका व्यक्तिहरुलाई दुबईमा भिजिट भिसामा बोलाउँछन् । र उतै अलपत्र पारिदिन्छन् ।
मकवानपुरका राजकुमार मोक्तानाले योगेशलाई ५ लाख रुपैयाँ दिएका थिए । भिजिट भिसामा आएपछि यता सबै काम खोज्ने जिम्मा आफ्नो भएको भन्दै योगेशले राजकुमारलाई बोलाएका थिए । तर, उनी एयरपोर्टबाटै फर्किनुप-यो ।
योगेशमात्र नभएर उनकी श्रीमती सुन्तली पनि त्यही ठगीको काममा सक्रिय छिन् । योगेशकी आमा ठगी दमिनीसमेत छोराबुहारीको ठगी धन्दामा सहयोग गर्छिन् ।
तबिता गुरूङको नाममा पैसा जम्मा गरेर दिपकचन्द्र अधिकारी, गोपी सुनार, कमल कार्की, प्रेमराज सिग्देल, राजकुमार मुक्तान लगायतका १४ जना ठगिएका छन् । भिजिट भिसामा दुबई बोलाएर ठगी गर्ने गिरोह नै सक्रिय रहेको पीडितहरूको भनाइ छ ।
दुबईमै बसेर नेपाली ठग्ने अर्को गिरोहका नाइके हुन् गोरखाका सुवास मालबुल । उनले दुबईमा भिजिट भिसामा बोलाएर त्यहाँबाट युरोप पठाइदिन्छु भन्दै १५ जनाभन्दा बढीबाट लाखौं ठगेका छन् । उनले प्रतिव्यक्ति ८ देखि १५ लाख रूपैयाँसम्म लिएका छन् ।
दाङ घोराहीका प्रेमबहादुर बोहरा, सल्यानका राजेन्द्र रावल, उदयपुरका राकेश राई, निजगढ बाराका शुक्रान्त लुम्बा, ताप्लेजुङका कालुसिंह थिङ, हेटौंडाका मिलन थिङ, दाङका प्रदिप बस्नेत, दाङकै नविन बस्नेत लगायतलाई युरोप पठाइदिने भनेर सुवासको गिरोहले दुबई बोलाएको थियो ।
दुबई बोलाएर उक्त गिरोहले अहिले १० जनालाई अलपत्र अवस्थामा राखेको छ । उक्त गिरोहमा मालबुसँगै स्याङ्जाका चित्रबहादुर थापा र सल्यानका कृष्ण भण्डारी छन् । कृष्णले नेपालबाट मान्छे बोलाउने काम गर्छन् । मालबुले पैसा व्यवस्थापन गर्छन् भने चित्रबहादुरले नक्कली कागजात बनाउने काम गर्छन् ।
उनीबाट पीडित एक व्यक्तिका अनुसार दुबई भिजिट भिसामा बोलाएर युरोप पठाउँछु भन्दै नेपालबाटै पैसा लिन्छन् । अनि दुबई पुगेपछि उनीहरुले अलपत्र पारिदिन्छन् । ‘सुरुमा आजभोलिमा काम हुन्छ भनेर झुलाएर राख्छ । अनि भिसाको टाइम सकिएपछि ओभरस्टे बनाइदिन्छ र अलपत्र पारिदिन्छ,’ ती पीडितले भने ।
