साफ महिला च्याम्पियनसिप जिताउन उत्कृष्ट भूमिका खेलेकी गोलकिपर रुपना चक्माको घर बंगलादेश सरकारले बनाइदिने भएको छ ।
प्रतियोगिताकै उत्कृष्ट गोलकिपर भएकी रुपनाको घर त्यहाँको सरकारले बनाइदिने भएको हो । नेपाललाई ३-१ गोलले हराउने क्रममा कयौँ प्रहारहरुलाई निस्तेज पारी टोलीलाई उपाधी जिताउन उनको ठुलो भूमिका थियो ।
रुपनाले मंगलबार आफ्नो फेसबुकमा यो जानकारी गराउँदै सरकारी प्रतिनिधिलाई धन्यवाद पनि दिएकी छिन् ।
बंगलादेशले सोमबार साफ च्याम्पियनसिपको उपाधि जितेपछि रंगमती जिल्लाका कमिस्नर मोहमद मिजानुर रहमान उपहार र नगद पुरस्कार दिन नानिआर्चर पुगेका थिए । एकै ठाउँका रुपना र ऋतु पुरना चक्मालाई जनही १ लाख ५० हजार टाँका नगद पुरस्कारसहित सरकारी टोली निवास पुगेको थियो ।
तर त्यहाँ पुगेपछि गाउँमा रहेको रुपनाको घरको कमजोर स्थिति देखेपछि सरकारले घर बनाउने रहमानले बताए । काठमाण्डौँबाट साफको उपाधि उचालेर बंगलादेशको टोली बुधबार दिउँसो बंगलादेश पुगेको छ ।
