७ असोज, धनगढी । नेपाली कांग्रेसले कैलाली जिल्ला कार्यसमितिका सभापति नारायणदत्त भट्टको जिम्मेवारी खोसिएको छ ।निवर्तमान सभापति शेरबहादुर देउवा पक्षीय भट्टले अधिवेशन नगराउने भएपछि उनको जिम्मेवारी खोसेर उपसभापति भीम बडुवाललाई कार्यवाहक जिल्ला सभापतिको जिम्मेवारी दिइएको छ ।
नेपाली कांग्रेस केन्द्रीय कार्यालयले बुधबार बडुवाललाई पत्र पठाउँदै १५औँ महाधिवेशनअन्तर्गत कैलालीमा जिल्ला मातहतका अधिवेशन सम्पन्न गर्न कार्यवाहक जिल्ला सभापतिको रूपमा विशेष जिम्मेवारी तोकेको जनाएको छ ।
महामन्त्री प्रदीप पौडेलद्वारा हस्ताक्षरित पत्रमा केन्द्रीय निर्वाचन समितिसँग समन्वय गरी तोकिएको जिम्मेवारी पूरा गर्न बडुवाललाई निर्देशन दिइएको छ ।
पत्रको बोधार्थ केन्द्रीय निर्वाचन समिति र नेपाली कांग्रेस कैलाली जिल्ला कार्यसमितिलाई दिइएको छ ।
