सिट बाँडफाँट गर्न बनेको सत्ता गठबन्धनको कार्यदलले बुधबार बस्ने बैठकपछि शीर्ष नेतालाई प्रतिवेदन बुझाउने तयारी गरेको छ । सकेसम्म अधिकतम सहमति जुटाएर प्रतिवेदन बुझाउने कार्यदल सदस्यहरु बताउँछन् । तर, प्रतिवेदन बुझाउने अन्तिम घडीमा समेत कुन दलले कति सिट लिने र कसरी भागबण्डा मिलाउने भन्नेमा कार्यदलकै सदस्यहरु स्पस्ट हुन सकेका छैनन् । यही अस्पस्टताका कारण कार्यदलको छलफलमा जनमोर्चा बाहेकका कार्यदल सदस्यहरुले आफ्नो बटमलाइनबारे मुख खोलिनसकेको उनीहरुकै भनाइ छ ।
मंसिर ४ मा हुने प्रतिनिधिसभा र प्रदेशसभा सदस्य निर्वाचनका लागि प्रत्यक्षतर्फका सिटमा सहमति जुटाउन साउन २० गते सत्ता गठबन्धनको शीर्ष नेतृत्वले ११ सदस्यीय कार्यदल गठन गरेको थियो । कार्यदल बनेदेखि एक महिनाको अवधिमा बसेका बैठकहरुमा दलका नेताहरुले अहिलेसम्म आफ्नो स्पस्ट ‘बटमलाइन’ नै पेस नगरेकाले घनिभूत छलफल हुन नसकेको हो ।
