प्रभाव संवाददाता, बैशाख ४, काठमाडौं l सि.वि गहतराज नेतृत्वको सामाजिक एकता पार्टी र बि.पी खनाल नेतृत्वको जनजागरण पार्टी विच एकीकरण भएको छ l दुवै पार्टीले “सुन्दर, शान्त, समृद्ध नेपाल” दलको मूल दर्शन मान्न सहमत भएको पार्टी एकीकरण सम्झौता पत्रमा उल्लेख गरिएको छ l
एकीकरण पछी पार्टीको नाम सामाजिक एकता पार्टी नेपाल रहने छ भने एकीकृत पार्टीको अध्यक्षमा सि.वि. गहतराज र महासचिवमा डा. वि.पी. खनाल रहने छ । त्यसैगरी, वरिष्ठ उपाध्यक्षमा सुनिल महर्जन रहनेछ । एकीकरण घोषणा पत्रमा जनजागरण पार्टीका अध्यक्ष डा. वि.पी. खनाल र सामाजिक एकता पार्टीका अध्यक्ष सि.वि. गहतराजले हस्ताक्षर गरेका छन् । एकीकृत पार्टीको झण्डा, लोगो, विधान, सिद्धान्त, दर्शन र चुनाव चिन्ह जनजागरण पार्टीको नै यथावत रहने भएको छ ।
एकीकरण घोषणा सभामा नेपाल राष्ट्रिय मण्डली संगतिका अध्यक्ष रेभ. हनोक तामाङले दुई पार्टीबीच भएको सहमति पत्र पढेर दुई पार्टी एकीकरण भएको घोषणा गरेका थिए ।
समान विचारधारा र सिद्धान्त बोकेका राजनीतिक दलहरूसँग सहकार्य र एकता गर्ने पार्टीले नीति लिएको र यो एकीकरण सुरूवात मात्रै भएको अध्यक्ष गहतराजले बताए ।
डा.वि.पी. खनालले जन समुदायको चाहना अनुरूप निरन्तर छलफल र सम्वादपछि दुई पार्टीबिच एकीकरण भएको बताए ।
सामाजिक एकता पार्टी नेपाल र जनजागरण पार्टी नेपाल बिच बैशाख ३ गते शंखमुलस्थित एवान पार्टी प्यालेसमा पार्टी एकीकरण घोषणा सभामा १३ बुँदे सहमतिमा दुवै पार्टीका अध्यक्षहरूले हस्ताक्षर गरेका थिए ।
